Apoy ng kasabikan
Unti-unti nang pinapatay ng hanging dala ng lipunang mandurugas,
Kamay na amoy-kalawang
Na kahit ilang hugas,
Ang basurang nilalangaw na kapatid ng bangkay na naaagnas.
Dalawin nawa ng mga bulaklak
Na nalanta't nangamatay
Sa pangangalaga ng mga mapiling kamay.
Hibik ng mga taong nagsisisi sa harap ng lamay—"parang awa ninyo na" sambitla ng patay.
Kamusmusang tinatawanan ng mga multong ánimo'y kung sinong mga bayani;
Pandayan ng mga pagsambang mga naghaharing-uri—sa sariling templo gawa ng maitim na budhí.
Sandigang tinta ng mga gaa't pasakit,
Walang humpay sa aking dugô kung sumipsip
Indák ng kamay kung 'di ma'y hanging iihip.
At doon ma'y magpapatuloy ang dalúyong na sisira sa baít at magtatalaga sa aking,
"Ikaw ang patay na hari sa sarili mong pag-iisip."
Comments
Post a Comment