Hindi.
Hindi mo pwedeng takasan ang pwersang ito.
Hindi mo makakayang wakasin ang sinimulan.
Hindi mo ito pwedeng tawaging delubyo kahit gaano mo pa kagusto.
Dahil ito, ito ang bumuo, bumubuo at bubuo sa 'yo.
Ang bawa't sistema nito'y
Kabalikat na ng sistema mo.
Hindi mo makakayang pabayaan
Ang mga bagay na minsan sa 'yong nakatulong.
Ang bagay na minsan ka na ring ikinulong.
Oo. Mahirap itong sabayan;
Oo. Totoong mahirap ang pakikipaglaban.
Subalit ito ang kinakailangan mo; kailangan mo ang laban.
Ang hirap na papasuking alay para sa bayan.
Sa nagkakagulo mo nang bayan.
Nariyan kang sasabak sa gulo na wala nang ibang dulot,
Na hindi lámang ang pawis,
Kung 'di maging ang dugong bubuhos nang bubuhos
At dadaloy nang dadaloy
Dala ng pagsilakbó ng damdamin na pilit isinisigaw ng matatapang na puso at diwa,
Hanggang sa mawalan ka na ng hininga, Hanggang sa mawalan ka na ng pag-asa. Pero hindi.
Hindi mo ititigil ang laban.
Hindi ibong nag-aasam ng kalayaan
Ang laging dalà
Ng bawa't sigaw,
Ng bawa't hikbi,
Ng bawa't iyak,
Dalà rin nito'y ang inaasam-asam na hustisya sa mga bagay na nakikita mong hindi pantay at makatarungang atake sa mga mata mong mugtong patuloy na pinahihirapan ng nakatataas na pumipilit na supilin ang bawa't isa.
Ang paglípol sa layang hangad ang mag-uudyok sa bawa't pag-aksyon,
Sa bawa't pagsaad,
na pigilin ang ninanais
Ninanais na pagpiglas sa rehas na bumabaon sa mga Pilipino.
Bayang nasasadlak,
Nasasadlak sa dusa't kulungan ng isang sistemang patuloy na dumadaloy sa kaisipa't diwang nagpapatuloy sa paghubog na minsang nagpapaláson sa kawalang-malay ng iyong kabataan.
Bayan, ang sistema mo ay ang sistema ko. Ang bango't baho mo'y patuloy.
Patuloy, tuloy-tuloy-tuloy na aalingasaw. Paano ko 'to tatapusin?
Paano ka lulubusin?
Hindi ka pwedeng matapos.
Uulitin ko, hindi ka pwedeng matapos. Hindi ka pwedeng ganyan na lang. Ipagpapatuloy ko ang laban,
Sasamahan mo ako.
Tulungan mo ako.
Hanggang ang mga iyak at sigaw na naririnig ko lang ay makikintal sa isipang magiging bukás,
Magiging bukás para sa 'yo,
Para sa 'yo, kamtan ang magandang bukas.
Ako ay iisa.
Iisang may isip at diwa.
Narito akong hahawakan ka.
Hahawakan ka't ipaáalam ko sa 'yong sa labang kong ito'y kasáma ka.
Comments
Post a Comment